உயர்தர கல்வி நடவடிக்கைகளை தொடர விரும்பும் மாணவர்களுக்கான கல்விப் பணிகள் இவ்வருடம் க.பொ.த சாதாரண தரப் பரீட்சைகள் நிறைவடைந்ததைத் தொடர்ந்து உடனடியாக ஆரம்பிக்கப்படும் என கல்வி அமைச்சர் சுசில் பிரேமஜயந்த தெரிவித்துள்ளார்.
கொரோனா வைரஸ் தொற்று காரணமாக தாமதமான பாடசாலை கல்வி பாடத்திட்டத்தை உள்ளடக்கும் கல்வி அமைச்சின் முயற்சியின் ஒரு அங்கமாகவே இந்த நடவடிக்கைகள் மேற்கொள்ளப்பட்டு வருவதாக அமைச்சர் பிரேமஜயந்த தெரிவித்தார்.
எதிர்காலத்தில் க.பொ.த சாதாரண மற்றும் உயர்தரப் பரீட்சைகள் போன்ற அரச பாடசாலைப் பரீட்சைகளின் கால எல்லையை வழமைக்குக் கொண்டுவருவதற்கான அமைச்சின் நடவடிக்கைகளின் ஒரு பகுதியே இது எனவும் அவர் மேலும் தெரிவித்தார்.
பாடசாலை மாணவர்களுக்கான பல்கலைக்கழக அனுமதியில் ஏற்படும் காலதாமதத்தை தடுப்பதற்காகவும் இவ்வாறான நடவடிக்கைகள் எடுக்கப்படுவதாக கல்வி அமைச்சர் மேலும் தெரிவித்தார். (யாழ் நியூஸ்)