சமையல் எரிவாயு சிலிண்டர் வெடிப்பு சம்பவங்களினால் நுகர்வோர் அச்சம் கொண்டுள்ளமை நியாயமானது என்பதை ஏற்றுக் கொள்கிறோம். தற்போதைய பிரச்சினைக்கு அறிவியல்பூர்வமாக தீர்வு காண்பது அவசியமாகும். எரிவாயு சிலிண்டருடன் பொருத்தப்பட்டுள்ள உபகரணங்களில் காணப்பட்ட பிரச்சினை தற்போது சிலிண்டர் பிரச்சினையாகி விட்டது.
இறக்குமதி செய்யப்படும் எரிவாயு மாதிரிகளை இந்தியாவில் உள்ள ஆய்வு கூடத்துக்கு பரிசோதனை நடவடிக்கைகளுக்காக அனுப்பி வைத்துள்ளோம். மூன்றாம் தரப்பினரிடமிருந்து அறிக்கை பெறுவது அவசியமாகும் என லிட்ரோ நிறுவனத்தின் தலைவர் தெஸார ஜயசிங்க தெரிவித்தார்.
அவர் மேலும் குறிப்பிட்டுள்ளதாவது, எரிவாயு சிலிண்டருடன் பொருத்தப்பட்டுள்ள உபகரணங்களில் காணப்படும் பிரச்சினை தற்போது சிலிண்டரின் பிரச்சினை என்ற அளவுக்கு நிலைமை எல்லை கடந்துள்ளது.
கடந்த காலங்களிலும் இவ்வாறான சம்பவங்கள் இடம்பெற்றன.ஆனால் அப்போது இந்தளவுக்கு கவனம் செலுத்தப்படவில்லை. தற்போது அதிகம் கவனம் செலுத்தப்படுவது நன்மையானதே என்றும் அவர் தெரிவித்தார்.
-இராஜதுரை ஹஷான்
