ஹொரணையில் உள்ள உணவகம் ஒன்றில் இருந்து நேற்று (19) கடத்தப்பட்ட யுவதி ஒருவர் சம்பவம் இடம்பெற்று சுமார் மூன்று மணித்தியாலங்களின் பின்னர் ஹொரணை பொலிஸாரால் கண்டுபிடிக்கப்பட்டதாக தெரிவிக்கப்பட்டுள்ளது.
உணவகத்தில் இருந்து சிசிடிவி காட்சிகளில், பெண் ஒரு குளிர்பானம் வாங்குவதையும், மேஜையில் அமர்ந்திருப்பதையும் ஒரு ஆணும் பெண்ணும் வலுக்கட்டாயமாக உணவகத்திலிருந்து வெளியே அழைத்துச் செல்வதைக் காட்டுகிறது.
சம்பவம் தொடர்பில் உணவகத்தின் ஊழியர்கள் உடனடியாக பொலிஸாரின் அவசர தொலைபேசி இலக்கத்திற்கு அறிவித்ததையடுத்து, ஹொரணை பொலிஸ் அதிகாரிகள் பாதிக்கப்பட்டவரின் கைப்பையை கண்டுபிடித்துள்ளனர், அதன் மூலம் அவரது தாயை தொடர்பு கொள்ள முடிந்தது.
கடந்த சில மாதங்களுக்கு முன்னர் தனது மகள் காதல் விவகாரத்தை முடித்துக்கொண்டதாகவும், பண்டாரகமவைச் சேர்ந்த முன்னாள் காதலனால் தொடர்ந்தும் அச்சுறுத்தலுக்கு உள்ளானதாகவும் பாதிக்கப்பட்ட பெண்ணின் தாய் பொலிஸாரிடம் தெரிவித்துள்ளார்.
இதனால், பாதிக்கப்பட்ட பெண் தனது பாதுகாப்பிற்காக பண்டாரகமவில் உள்ள உறவினர் ஒருவரின் இடத்தில் தங்கியிருந்ததாக அவர் மேலும் தெரிவித்தார்.
முன்னாள் காதலரின் வீட்டைத் தேடிய பொலிஸார், பண்டாரகம - அங்குருவாதோட்டை வீதியிலுள்ள குடியிருப்பு ஒன்றில் குறித்த யுவதி மீட்கப்பட்ட நிலையில், கடத்தலுக்குப் பயன்படுத்தப்பட்ட வாகனத்தையும் கண்டுபிடித்துள்ளனர்.
சந்தேகநபர், ஒரு பெண் மற்றும் சந்தேக நபருக்கு உதவிய மற்றுமொரு ஜோதிடர் ஆகியோர் கைது செய்யப்பட்டு ஹொரணை நீதவான் முன்னிலையில் ஆஜர்படுத்தப்பட்டதன் பின்னர் அவர்கள் 2023 ஆம் ஆண்டு ஒக்டோபர் 23 ஆம் திகதி வரை விளக்கமறியலில் வைக்கப்பட்டுள்ளனர். (யாழ் நியூஸ்)