சுமார் 5 லட்சம் கடன் அட்டை பாவனையாளர்களின் தகவல்களை திருடி சட்டவிரோதமாக சேமித்து வைத்து 5.5 மில்லியன் ரூபா பெறுமதியான பல பொருட்களை கொள்வனவு செய்த குற்றச்சாட்டில் 18 வயது இளைஞர் ஒருவர் கைது செய்யப்பட்டுள்ளார்.
இலங்கை பொலிஸ் கணினி குற்றப் புலனாய்வுப் பிரிவினரால் குறித்த இளைஞன் கைது செய்யப்பட்டுள்ளார்.
சந்தேகநபர் 90 கிரெடிட் கார்டுகளைப் பயன்படுத்தி சுமார் 5.5 மில்லியன் ரூபா பெறுமதியான பொருட்களை ஒன்லைன் மூலம் கொள்வனவு செய்துள்ளதாக ஆரம்பகட்ட விசாரணைகளில் தெரியவந்துள்ளது.
2023 ஆம் ஆண்டு ஜனவரி மாதம் 04 ஆம் திகதி ஆன்லைன் சில்லறை விற்பனை நிலையமொன்றினால் செய்யப்பட்ட முறைப்பாட்டிற்கு அமைய கடந்த வியாழக்கிழமை (05) தும்மலசூரிய எனும் பகுதியில் வைத்து அவர் கைது செய்யப்பட்டதாக பொலிஸார் தெரிவித்தனர்.
சந்தேகநபர் சமூக ஊடக பயனர்களை பயன்படுத்தி கிரெடிட் கார்டு வைத்திருப்பவர்களின் விவரங்களை சட்டவிரோதமாக சேமித்து வைத்து இந்த மோசடியை மேற்கொண்டதாக தெரிவிக்கப்பட்டுள்ளது.
சந்தேகநபரின் கணனியை பரிசோதித்ததில், அவர் சுமார் 500,000 கிரெடிட் கார்டு பயன்படுத்துபவர்களின் தகவல்களை சட்டவிரோதமாக சேமித்து வைத்திருந்ததாகவும், அந்த தரவுகளை ஆன்லைனில் பல்வேறு பொருட்களை வாங்குவதற்கு பயன்படுத்தியதாகவும் தெரியவந்துள்ளதாக போலீசார் தெரிவித்தனர்.
சந்தேகநபர் கிரெடிட் கார்ட் தரவுகளைப் பயன்படுத்தி கணனிகள், கமராக்கள், உணவு, மதுபானம் உள்ளிட்ட பல பொருட்களை அவ்வப்போது கொள்வனவு செய்துள்ளதாக தெரிவிக்கப்பட்டுள்ளது. சந்தேக நபர் பல்வேறு பகுதிகளில் இருந்து கொள்வனவுகளை மேற்கொண்டுள்ளதுடன் பொருட்களை விநியோகிப்பதற்கும் வெவ்வேறு இடங்களை தெரிவு செய்துள்ளார்.
சந்தேக நபர் க.பொ.த சாதாரண தரப் பரீட்சையில் சித்தியடைந்து ஒப்பந்தத் தொழிலாளியாக கடமையாற்றும் நபர் மற்றும் கைத்தொலைபேசியைப் பயன்படுத்தி இந்த மோசடியை மேற்கொண்டுள்ளதாக பொலிஸார் தெரிவித்துள்ளனர்.
சந்தேக நபருடன் தொடர்புடைய ஏனைய நபர்களை கைது செய்ய பொலிஸார் விசாரணைகளை ஆரம்பித்துள்ளனர். (யாழ் நியூஸ்)
