இலங்கை மின்சார சபையின் தற்போதைய இழப்பை ஈடுகட்டுவதற்காக 2023 ஜனவரி மற்றும் ஜூன் மாதங்களில் இரண்டு படிகளின் கீழ் மின்சார கட்டணத்தை அதிகரிப்பதற்கு அமைச்சரவை அங்கீகாரம் வழங்கியுள்ளது.
பாராளுமன்ற உறுப்பினர் பாட்டலி சம்பிக்க ரணவக்க தலைமையில் நேற்று (29) நடைபெற்ற தேசிய சபையின் பொருளாதார ஸ்திரப்படுத்தல் தொடர்பான குறுகிய மற்றும் நடுத்தர கால வேலைத்திட்டங்களை அடையாளம் காணும் உபகுழுவின் கூட்டத்தில் இந்த விடயம் தெரிவிக்கப்பட்டது.
தற்போதைய நட்டத்தை ஈடுகட்டுவதற்கு சுமார் 70% மின்சார கட்டணத்தை அதிகரிக்க வேண்டும் என மின்சார சபை பிரதிநிதிகள் சந்திப்பின் போது தெரிவித்ததாக இலங்கை பாராளுமன்றத்தின் அறிக்கை ஒன்றில் தெரிவிக்கப்பட்டுள்ளது.
அதன்படி, இலங்கை பொதுப் பயன்பாடுகள் ஆணைக்குழுவின் (PUCSL) அனுமதியைப் பெறுவதற்கு உரிய நடவடிக்கைகள் எடுக்கப்பட உள்ளதாக மின்சார சபையின் மேலதிக பொது முகாமையாளர் ரொஹான் செனவிரத்ன தெரிவித்தார்.
இலங்கை மின்சார சபை தற்போது கிட்டத்தட்ட ரூ. 650 பில்லியன் தொகையை வங்கிகள் மற்றும் மின்சார விநியோகஸ்தர்கள் உட்பட பல்வேறு தரப்பினரிடம் இருந்து கடனாக பெற்றுள்ளது.
செலுத்த வேண்டிய தொகையில் கிட்டத்தட்ட ரூ. 35 பில்லியன் புதுப்பிக்கத்தக்க எரிசக்தியை வழங்கிய நிறுவனங்களுக்கும், மேலும் ரூ. 75 பில்லியன் அனல் மின் விநியோகஸ்தர்களுக்கு வழங்கப்படவுள்ளது.
இதற்கிடையில், மின்சாரக் கட்டணங்கள் அதிகரிக்கப்படலாம் என்ற செய்திகளை PUCSL மறுத்துள்ளது.
இது தொடர்பில் அறிக்கையொன்றை விடுத்துள்ள PUCSL தலைவர் ஜனக ரத்நாயக்க, மின்சார கட்டணத்தை அதிகரிப்பது தொடர்பில் தற்போது பரிசீலிக்கப்படவில்லை என தெரிவித்துள்ளார்.
முழு நாடாளுமன்ற அறிக்கை: https://www.parliament.lk/news-en/view/2953
