முன்னாள் ஜனாதிபதி கோட்டாபய ராஜபக்ச இலங்கையின் பாதுகாப்புச் செயலாளராக இருந்த போது அவரைக் கொலை செய்ய முயற்சித்ததாக குற்றம் சாட்டப்பட்ட முன்னாள் விடுதலைப் புலி உறுப்பினர் ஒருவரை கொழும்பு மேல் நீதிமன்றம் அனைத்து குற்றச்சாட்டுக்களிலிருந்தும் விடுவித்துள்ளது.
கொள்ளுப்பட்டி பித்தல சந்தியில் ராஜபக்ச மீது தற்கொலை குண்டுத் தாக்குதல் மூலம் படுகொலை முயற்சிக்கு திட்டமிட்ட குற்றச்சாட்டில் பொறியியலாளர் சிவலிங்கம் ஆரூரன் 17 வருடங்களாக விளக்கமறியலில் வைக்கப்பட்டிருந்தார்.
எவ்வாறாயினும், குறித்த வழக்கு நேற்று (16) விசாரணைக்கு எடுத்துக்கொள்ளப்பட்ட போது, கொழும்பு மேல் நீதிமன்ற நீதிபதி நவரத்ன மாரசிங்க குற்றம் சாட்டப்பட்டவர்களை சகல குற்றச்சாட்டுக்களிலிருந்தும் விடுவித்தார்.
உதவிப் பொலிஸ் அத்தியட்சகர் சிசில் டி சில்வா முன்னிலையில் வழங்கப்பட்ட வாக்குமூலத்தைத் தவிர, குற்றம் சாட்டப்பட்டவருக்கு எதிராக வேறு எந்த ஆதாரமும் இல்லை என சொலிசிட்டர் ஜெனரல் நீதிமன்றத்திற்கு அறிவித்தார்.
சொலிசிட்டர் ஜெனரல் முன்வைத்த உண்மைகளை கருத்திற்கொண்ட நீதிமன்றம், குற்றம் சாட்டப்பட்டவர்களை வழக்கு தொடர்பான அனைத்து குற்றச்சாட்டுகளில் இருந்தும் விடுவிக்க உத்தரவிட்டது. (யாழ் நியூஸ்)
